A Deputación apoia con novas axudas os proxectos de revitalización das nosas asociacións empresariais

A Deputación da Coruña vai achegar 478.625,92 euros para apoiar a realización de actividades de promoción económica dos Concellos e entidades da nosa provincia. O Boletín Oficial da Provincia (BOP) recolle xa a concesión provisional desta liña de subvencións a un total de 72 organismos, entre os que se atopan as principais entidades empresariais dos concellos da nosa comarca. As axudas oscilan entre un mínimo de 1.320 euros e un máximo de 15.500 euros.

A finalidade deste programa é dinamizar e poñer en valor a oferta comercial, hostaleira e turística locais a través de múltiples actividades como xornadas, feiras, certames, formacións ou obradoiros. Tamén se dá apoio á edición de guías de empresas e outras publicacións para a promoción económica nos diferentes concellos da provincia da Coruña.

Entre as axudas destinadas aos nosos concellos figuran as seguintes: 7.457 euros para as actividades de promoción do comercio da ABE (Asociación Boirense de Empresarios); 9.750 euros para as accións de dinamización económica da Asociación de Comerciantes e Profesionais de Noia Histórica; 14.750 euros para o programa de desenvolvemento económico, comercial e hostaleiro da Asociación de Empresarios de Ribeira; e 13.750 euros para as actividades de promoción e revitalización da ARE (Asociación Rianxeira de Empresarios).