O litoral da provincia da Coruña permanecerá en alerta vermella este sábado, xornada na que se mantén o aviso amarelo por neve en zonas de Lugo e Ourense.
Meteogalicia informa que a alerta vermella por mar combinado con ondas de ata nove metros estará decretada desde a Costa da Morte ata A Mariña desde as 3,00 horas da madrugada ata as 15,00 horas.
Neste momento, o aviso pasará a laranxa, cor no que permanece o litoral de Pontevedra.
O sábado Galicia continuará na influencia dunha borrasca centrada ao norte de Francia e con aire frío nas capas medias e altas da atmosfera. Así agárdase unha xornada de ceos moi nubrados con chuvascos máis frecuentes e persistentes na metade norte onde poderán vir ocasionalmente acompañados de sarabia. As temperaturas sen cambios significativos. O vento soprará forte do noroeste.
