O ribeirense Antonio Piñeiro gaña con “Trávelin” o prestixioso Premio Manuel Lueiro Rey de Novela Curta

O escritor e profesor de Ribeira nunha imaxe de Ana Rial

O xurado desta vixésimo sétima edición do Premio Manuel Lueiro Rey de Novela Curta, convocado polo Concello do Grove, deu a coñecer esta semana que o galardón deste ano irá dar a mans do escritor e profesor ribeirense Antonio Piñeiro, polo seu libro Trávelin.

O xurado, formado polos escritores e críticos literarios Alberto Avendaño, Armando Requeixo, Ánxela Rodríguez, Mario Regueira e Ignacio Vidal Portabales, elixiron finalmente a dita novela de Piñeiro (presentada baixo o pseudónimo Avelaíña)nunha edición do certame que, segundo salientaron, volveu destacar pola alta calidade das contribucións presentadas, confirmando o Premio Manuel Lueiro Rey como “un dos máis importantes do escenario literario galego”.

Queda pendente da evolución da situación actual a celebración do acto de entrega deste galardón que, ademais dos 3.000 euros, consiste na publicación da obra a través da editorial Edicións Xerais de Galicia.

Antonio Piñeiro (Ribeira, 1962), como lembraremos, é un dos escritores da nosa comarca máis recoñecidos, prestixiosos, innovadores e prolíficos. Atesoura numerosas distincións tales coma o García Barros, no 2011, por As fiandeiras, ou o Torrente Ballester, no 2017, por A través do fume, ao que se engaden, entre outros, o Premio Xosé Neira Vilas por Esca do profesor ou o Premio de Novela Curta Cidade Centenaria de Ribeira por Celada.