Paseniño e cun futuro incerto que poderá ser máis prometedor e optimista con axuda de todas e todos, o panorama editorial galego vai volvendo á vida logo da longa interrupción motivada pola COVID-19. Xerais, un dos principais selos editoriais da nosa terra, mostrou este luns 25 os detalles dos seus vindeiros lanzamentos, un total de oito novidades para todos os gustos, idades e tendencias, entre os que se conta a novela Celada, do escritor ribeirense Antonio Piñeiro.
Celada, como lembraremos, é a obra gañadora da sétima edición do Premio de Novela Curta Cidade Centenaria de Ribeira. Sitúanos nos anos setenta, unha década se fondas transformación sociais e políticas na que ferven as revoltas universitarias, como por exemplo as protagonizadas en Compostela pola mocidade activista que enchía daquela os campus e as facultades. A novela de Antonio Piñeiro pon o foco nunha destas accións de mobilización, que está a piques de ser desbaratada por redada policial comandada polo inspector Alaín. Segundo fai saber Xerais sobre o argumento, “pouco imaxina o inspector o que vai atopar detrás da investigación que está a facer sobre un dos grupos insurxentes que operan na cidade, nun emocionante final da novela”.
