Antonio Piñeiro (Ribeira 1962), un dos máis destacados escritores galegos da actualidade, vén de sumar un novo recoñecemento ao seu amplo historial de distincións pola calidade e a innovación da súa obra literaria. Estamos a falar da concesión do cuarto Premio Xosé Neira Vilas de novela curta convocado pola fundación que leva o nome do autor de Memorias dun neno labrego e Cartas a lelo.
O xurado do premio, integrado polos membros do padroado da fundación (Juan Andrés Fernández, Rosalía Morlán, Pilar Sampedro e Fernando Redondo), e máis polo crítico e profesor universitario Armando Requeixo, decidiu por unanimidade conceder o dito galardón a Esca do profesor, do ribeirense Antonio Piñeiro Fernández.
O xurado salientou “a calidade do relato”, a súa ambición estética e os camiños de experimentación literaria que deixa abertos (trátase dunha obra en espiral con gran capacidade para xerar un “clima de tensión narrativa”). Tamén enxalzou a riqueza lírica e léxica da novela breve premiada, “unha proposta aberta a diversas interpretacións cun final impactante e iluminador”.
O xurado tamén destacou a alta participación nesta cuarta convocatoria, que acadou os trece orixinais presentados, “a cifra máis alta dende que se creou o premio”. Este será entregado este domingo 3 de novembro, nun acto público na sede da Fundación Xosé Neira Vilas en Vila de Cruces (Gres), coincidindo coa celebración do Día de Neira Vilas.
O galardón dado a coñecer estes días é o terceiro premio concedido este ano ao novelista de Ribeira, logo do XIV Premio Narración Curta Concello de Curtis (por Onde nos leven) e o VII Premio de Novela Curta de Ribeira (por Celada, aínda sen publicar).
A maiores de todo isto, a súa novela breve A través do fume (unha das máis innovadoras e orixinais propostas literarias das nosas letras recentes) foi obxecto, en 2017, do Premio Torrente Ballester. En A través do fume, Piñeiro relata a historia dunha muller que viaxa ao norte de Europa na procura das súas orixes e dun pasado que ten que reescribir a medida que relembra a súa nenez e este proceso de recuperación mestúrase co seu presente en aeroportos, embarques e estacións de tren.
