O Concello de Porto do Son quere estender o compromiso pola accesibilidade do que vai facer gala no seu proxecto de reforma portuaria, ou en iniciativas de acondicionamento como a levada a cabo no núcleo de Outeiro, ao que sen dúbida é un dos grandes destinos turísticos do municipio e da comarca: o Castro de Baroña. Segundo fixo saber o Concello, estase a preparar o terreo para unha iniciativa que permita a visita ao enclave castrexo a todo tipo de colectivos de persoas con mobilidade reducida, unha iniciativa que tería o apoio da Xunta e que se presenta como un complemento para a posta en valor co complexo e a súa conservación.
O primeiro treito do proxecto de accesibilidade consistiría en facer un vieiro inclusivo e libre de obstáculos até o primeiro miradoiro do castro, cousa para a que sería preciso realizar unha expropiación de terreos. De xeito paralelo quérese avanzar na protección do poboado e a súa contorna, prexudicado estes últimos anos non só polos factores climáticos e naturais, senón tamén (e sobre todo) pola acción humana, xa que, como lembrou o alcalde Luis Oujo, é un tesouro histórico que ten máis de 100.000 visitas ao ano. Con este fin de mellorar a protección e avanzar na súa conservación, o Concello pediu a colaboración da Consellería de Cultura, xa que se trata dun traballo de “mantemento obrigatorio” que economicamente, a Administración local non ten capacidade para asumir.
