A provincia da Coruña será protagonista o ano vindeiro da revista National Geographic. A iniciativa pertence á campaña de revitalización do sector da área de Turismo da Deputación, que leva a cabo Xosé Regueira. Baixo o lema 965 km de costa e un camiño infinito dan para moito, o proxecto pretende recuperar o turismo despois da crise sanitaria. Darase visibilidade a grandes paraxes naturais e enclaves históricos da nosa comarca, como o Dolmen de Axeitos, o Castro de Baroña ou o Parque Natural de Corrubedo.
En total, haberá 12 meses para difundir os lugares de interese da provincia na revista. O Dolmen de Dombate comezará a programación en xaneiro, mentres que o Mosteiro de Caaveiro pechará a revista en decembro. National Geographic visitará os lugares que teñan unha gran riqueza paisaxística como o estuario do río Anllóns, o porto de Corme, o miradoiro da Curota na Pobra do Caramiñal (con vistas espectaculares á Ría de Arousa), o Ézaro, a serra da Capelada, a praia do Pindo, a paisaxe de Traba e as dunas de Corrubedo ou o Monte Louro e a lagoa das Xarfas. Ademais, a revista recollerá o calendario dos recursos patrimoniais e artísticos como a catedral de Santiago de Compostela no mes de xullo deste ano Xacobeo, o Castro de Baroña, a Torre de Hércules, o monumento o Mirón de Arteixo, o Hórreo en Nantón, o Dolmen de Axeitos ou os museos navais de Ferrol.
O vicepresidente e responsábel da área de Turismo, Xosé Regueira, sinala que “ser protagonistas do calendario da revista Viajes de National Geographic é unha oportunidade para a promoción turística dos recursos da provincia cunha publicación que ten como destino un público moi amplo e especialmente interesado en viaxar”. Ademais, Regueira explica que “o 2021 ten que ser un ano de recuperación dun sector especialmente afectado pola pandemia. Hai que demostrar que a provincia da Coruña ofrece destinos seguros e saudábeis que poderán ofrecer posibilidades tanto para un sector turístico desexoso de volver a viaxar como para quen busca unha opción sen riscos nun período tan complexo como o que vivimos”.
Na portada da revista, destacará unha fotografía da ría de Ares. Do mesmo xeito, na contraportada aparecerá o bosque encantado nas beiras do río Sarela coa icona da campaña de promoción turística da Deputación da Coruña e o seu lema. O calendario entregarase de balde en xaneiro.
next
