Este 23 de decembro ao mediodía, no Auditorio de Rianxo, a escritora, actriz e contadora Lorena Conde achegará ás familias locais unha actividade de narración oral, o Disfrace de Urrupinca Carmirola, ao abeiro do programa de Escola de Familias de Nadal. Na cita, Lorena tamén levará a cabo un obradoiro creativo complementario para as nenas e nenos. A actividade, que dará comezo ás 12.00 horas, está especialmente dirixida a crianzas de idades comprendidas entre os 3 e os 7 anos.
A protagonista do conto é a raposa Chiruca, á que lle encanta disfrazarse coa axuda da súa avoa, e que chegado certo punto, decide fantasiarse de Urrupinca Carmirola. Mais é complicado de facer porque o disfrace leva moitas cousas que a raposiña non ten. Aí entrarán en xogo os animais (algúns máis amigábeis ca outros), aos que Chiruca terá que pedir axuda creativa.
Inscricións: Enviando correo a normalizacion@concelloderianxo.gal ou chamando ao teléfono: 881 988 798.
