En Porto do Son arde un coche por completo despois de que o dono avisase da súa desaparición

Resulta completamente calcinado un vehículo de cuxa desaparición informou o dono a través do 112 Galicia.

Foron os axentes da Garda Civil quen confirmaron ao afectado que o coche que ardía en Gourís, en Porto do Son, era o mesmo que o seu propietario buscaba despois de deixalo nun taller.

Faltaban apenas uns minutos para as nove desta mañá cando o 112 Galicia recibiu a chamada dun veciño que informaba dun posible accidente na parroquia sonense de Queiruga. Indicou que había un coche ardendo nunha curva, enriba dunha ponte, pero descoñecía se había alguén no interior.

Decontado, o persoal do Centro Integrado de Atención ás Emerxencias de Galicia pediu a colaboración dos Bombeiros de Ribeira, así como dos voluntarios de Protección Civil e dos axentes da Policía Local e Garda Civil de Tráfico. Pouco despois, comprobaron que ninguén resultara ferido, pois o interior do coche estaba baleiro. Iso si, o vehículo ardeu por completo e mesmo derramou combustible procedente do seu depósito. De feito, activáronse medios e recursos para o control da vertedura nun regato próximo.

Mentres o servizos de emerxencias traballaban na extinción do lume, o 112 Galicia recibía unha segunda chamada relacionada con este suceso, pois tratábase do dono do coche que advertía da súa desaparición despois de deixalo nun taller. Foron os axentes da Garda Civil quen lle confirmaron que se trataba do mesmo vehículo que estaba ardendo en Gourís.