Catro dos seis moradores dunha vivenda, localizada no termo municipal coruñés de Dodro, foron evacuados na madrugada de hoxe con síntomas de intoxicación tras inhalar fume provocado por un incendio nunha das habitacións do inmoble.
Ocorreu ao fío das 03:30 horas nunha casa situada no lugar de Castro, na parroquia de Laíño, e ata o lugar desprazouse unha dotación dos Bombeiros de Boiro e outra do GES de Padrón para comprobar a situación despois de ser solicitados polos xestores do 112 Galicia.
Segundo a información facilitada ao Centro Integrado de Atención ás Emerxencias de Galicia, os equipos de intervención que acudiron ao lugar dos feitos tiveron que axudar aos ocupantes a abandonar o inmoble. Malia que o incendio fora apagado sen moitas complicacións, o fume acumulado no interior da vivenda foi suficiente como para provocar sintomatoloxías compatibles con intoxicación e obrigar a evacuar a catro persoas afectadas.
Os outros dous moradores foron atendidos in situ polo persoal de Urxencias Sanitarias de Galicia-061.
Este operativo tamén contou coa intervención dos axentes da Garda Civil. De momento, descoñécense as causas da orixe do lume.
