A Coordinadora para o Estudo de Mamíferos Mariños vén de informar da publicación no BOE (PDF), este martes, a resolución pola cal se cataloga (dende o Ministerio de Transición Ecolóxica) a toniña afro-ibérica ao abeiro da categoría de especies en perigo de extinción (principalmente por mor da acción humana), pasando dende a etiqueta de “vulnerábel”. Segundo explica o CEMMA, a mala situación de conservación deste mamífero, moi presente nas costas da nosa comarca (na imaxe móstrase unha toniña en Corrubedo) recomendou un aceso na categoría de protección. Na orixe deste avance por velar polo futuro das toniñas está o importante traballo despregado pola coordinadora ao longo de 30 anos.
Este traballo incluíu investigacións propias ou en colaboración con outros centros de investigación estatais e internacionais, e coa colaboración económica puntual da Unión Europea, e dos Ministerios e Consellerías da Xunta de Galicia competentes ao longo dos anos. Estes estudos aportaron información fulcral sobre a súa poboación, distribución, anatomía, reprodución, dieta, estado de saúde, ameazas ou xenética. Este labor xenético contribuíu a que en 2017 se recoñecese que as toniñas da Península Ibérica e do norte de África son unha subespecie distinta das demais recoñecidas previamente.
“As investigación destas tres décadas”, explica a coordinadora, “evidenciaron que a súa situación de conservación era cada vez peor, e en 2007 reclamamos a consideración do cambio de categoría de vulnerábel a en perigo de extinción cunha comunicación no congreso da SECEM, algo que repetimos posteriormente noutros foros científicos estatais e internacionais e diante das administracións”.