O Concello boirense comezou a habilitación dos aparcamentos para bicicletas no núcleo urbano. A falta de servizos de estacionamento desta modalidade foi unha das causas polas que o Concello de Boiro decidiu levar a cabo esta iniciativa. Unha decisión que ten como principal obxectivo, ademais de dotar duns servizos necesarios ós cidadáns para desprazarse en bicicleta e vehículos de mobilidade persoal, contribuír á sustentabilidade e o medio ambiente, reducindo o tráfico e os gases emitidos polos vehículos a motor.
Este investimento supón colocar un total de 14 aparcabicis repartidos por todo o núcleo urbano, así como polas zonas máis transitadas das parroquias. A instalación dos novos aparcamentos para bicicletas estase levando a cabo en espazos inutilizados da vila, situándoos así en zonas máis cómodas para os boirenses á hora de utilizar este novo servizo.
