A Concellería de Servizos de Noia que dirixe Marisol Villar presentou a semana pasada o programa de actividades locais para a conmemoración do 25-N, o Día Mundial contra a Violencia de Xénero, un programa que se está a desenvolver dende hai días baixo o lema Nin de Broma e que se centra en parte na importancia de loitar nos escenarios de comunicación onde está cada vez máis presentes as novas xeracións: as redes sociais e outros servizos online de interacción.
Segundo fixeron saber Marisol Villar e Julia Veiro (directora do CIM de Noia), “as novas tecnoloxías son unha nova forma de relacionarse e que supoñen un cambio importante na vida dos adolescentes”. Por este motivo, a campaña inclúe mensaxes nas redes sociais (un total de 7 sinais de violencia de xénero entre a mocidade, en cuxa difusión o Concello conta coa colaboración de clubs e asociacións locais), colocación de paneis nas estradas dos centros de ensino e edificios municipais e máis un concurso audiovisual para a xuventude local (o certame NindeBroma) no que se presentaron xa varias curtametraxes abordando a temática do 25-N e a importancia de xuntar forzas para pór freo a esta lacra social. Ademais, o Concello adheriuse á iniciativa De Fronte impulsada pola Deputación Provincial da Coruña, xunto con outros municipios da nosa comarca como por exemplo Boiro, A Pobra do Caramiñal, Porto do Son, Lousame, Outes, Dodro e Carnota.
