O Concello de Noia, a través da Concellería de Servizos Sociais, puxo en marcha unha campaña para fomentar o talento creativo das novas xeracións ao tempo que se avanza, dende idades temperás, contra a lacra da violencia de xénero. Trátase da campaña NindeBroma, que xa ten aberto o prazo de inscrición e que consiste nun concurso audiovisual para rapazas e rapaces menores de 18 anos.
O certame, unha iniciativa pola igualdade e contra a violencia machista, convida a elaborar e presentar curtametraxes relacionadas con estas cuestións sociais de especial relevancia.
Achegaranse aos premiados vales por valor de 200 euros (o primeiro), de 150 (o segundo) e 100 (o terceiro). Segundo se especifica nas bases, deberán ser consumidos en establecementos locais de Noia. Nas bases tamén se especifica que os vídeos non poden ter unha duración de máis de 5 minutos, que deben tratar a temática da violencia machista, que a data límite de entrega será a do 18 de novembro de 2020 e que o correo para facer os envíos é nindebromanoia@gmail.com.
