Francisco Valeiras González, “Quico” é o gañador da XXXIII edición do Premio de Poesía Eusebio Lorenzo Baleirón 2020 que convoca o Concello de Dodro. Así o decidiu por unanimidade o xurado, reunido esta mañá na Casa de Cultura. O xurado destaca da obra a aparición dunha voz que procura espazos aínda pouco transitados na nosa literatura, singularmente no territorio do pensamento. Trátase dunha voz que bota man da hibridación de discursos e que se revela, tanto na asunción das poéticas últimas, como na presenza de múltiples voces, facendo patente un amplo universo discursivo.
O gañador, que se presentou ao certame cun poemario titulado Urda, reside en Santiago de Compostela e é autor das obras: O tempo da Cireixa (Edicións Positivas, 2019) e O Elo (Urutau, 2020), concebida xunto a Emma Pedreira. No ano 2019 tamén participou na antoloxía “Arrincando marcos 2019”. Como gañador do Premio de Poesía Eusebio Lorenzo Baleirón recibirá 2.500 euros e a publicación da obra.
Coordinado nesta edición por Elvira Ribeiro Tobío, o xurado estivo composto: Ana Belén Salgado Domínguez, Antón Blanco Casás, Míriam Ferradáns Ferradás, Iolanda Pérez Zúñiga presidido por Francisco Xabier Castro Tourís, alcalde do Concello de Dodro e actuando como secretario Xoán Xosé Vicente Franco, concelleiro de Cultura e Patrimonio.
Tras a elección da obra premiada os membros do xurado, acompañados polo alcalde de Dodro, Xabier Castro, e Manuel Lorenzo Baleirón, irmán de Eusebio renderon un sentido tributo poético e realizaron unha ofrenda floral no cemiterio de San Xián de Laíño, onde repousan os restos do poeta Eusebio Lorenzo Baleirón.