A Coordinadora para o Estudo dos Mamíferos Mariños, CEMMA, vén de informar do inicio da tempada de lobos mariños na costa galega, animais antano presentes de xeito máis permanente na nosa costa pero hoxe visitantes frecuentes a partir de outono e até o remate do inverno, treito temporal no que as focas miúdas adoitan recalar en Galicia na procura de descanso.
A plataforma fai saber que o comezo da dita tempada arrincou coa detección do lobo mariño cincento (Halichoerus grypus) albiscado na praia de Vilarrube, na ría de Cedeira, o pasado domingo. Con todo, o CEMMA lembra que houbo unha excepción a esta norma estacional: a presenza da foca femia Doqui na contorna de Caión durante o pasado verán, sendo a primeira vez na historia coñecida que un exemplar de lobo mariño cincento prolonga aos meses estivais a súa estadía no noso litoral.
O CEMMA recorda tamén que as posibilidades de atopar estes mamíferos nas nosas praias, principalmente as cantábricas, non son “tan raras como se podería pensar”, porque son exemplares que chegan dende as colonias de cría do norte e polo tanto “están moi cansos, motivo polo cal poden baixar a terra a descansar e botar unha soneca tranquilamente”. A coordinadora tamén pon o foco na necesidade de aplicarmos unhas normas claras de comportamento ante os lobos mariños: cómpre que non nos acheguemos a eles para evitar molestalos ou provocar unha reposta agresiva, non bloquearlles a vía de fuxida e manter arredados, no caso de telos, aos nosos cans. Tamén é importante manter silencio, xa que os berros e o balbordo poden xerar estados de alarma innecesarios nos lobos mariños. Un consello moi importante é que chamemos ao 112 canto antes en canto albisquemos un exemplar na praia, para iniciar axiña as xestións da Rede de Varamentos.
