O Centro de Documentación Ambiental do CEIDA vén de recompilar nunha guía unha moi relevante serie de documentos sobre lixo mariño dirixidos aos centros de ensino e ás familias. Trátase, en palabras do centro emprazado en Oleiros (A Coruña), de libros e recursos multimedia de utilidade para concienciar sobre a problemática da proliferación nos mares de desperdicios xerados polo ser humano, principalmente plásticos.
A publicación forma parte das actividades dirixidas aos centros de ensino dentro do programa Para unha Transición Ecolóxica que o CEIDA está a desenvolver co apoio da Deputación da Coruña.
En concreto, a guía pretende poñer a disposición tanto dos profesionais da educación, formal e non formal, como das familias, unha selección de documentos cos que traballar a problemática da contaminación mariña, facendo especial fincapé aos residuos plásticos. Segundo lembra o centro de investigación do Castelo de Santa Cruz, “a acumulación de lixo no mar é un problema ambiental sen precedentes na historia do noso planeta, con efectos negativos de diversa índole sobre as nosas especies, hábitats e ecosistemas mariños, e xa hai unha chea de estudos que afirman, ademais, que até o 80% do lixo que chega aos océanos procede de actividades terrestres”.
Solucionar o problema, engade o CEIDA, só se pode acadar por medio da colaboración de toda a sociedade, por iso a guía de recursos encamíñase a actuar nos centros de ensino e nos fogares, poñendo a semente da concienciación nos futuros aliados para loitar contra os problemas ambientais.
O Centro de Documentación Ambiental Domingo Quiroga, entidade responsábel da guía, é un centro público de recursos de información e documentación sobre a Educación Ambiental e o Medio Ambiente. Situado no andar baixa do Castelo de Santa Cruz (Oleiros), o seu funcionamento é similar a o dunha biblioteca especializada, aberta a toda a cidadanía, e alberga nas súas instalacións un amplo e variado fondo documental con máis de 28.000 recursos bibliográficos.
