O Concello de Dodro recibirá financiamento da Deputación da Coruña, a través do Plan Único, para un proxecto que permitirá continuar coa rede de saneamento no lugar da Cancela Abrea. A iniciativa do Plan Único da Deputación suporá un investimento de algo máis de 7 millóns de euros na súa totalidade.
O Plan Único servirá para financiar un total de 319 obras, das cales, 65 basearanse na construción de redes de abastecemento e saneamento correspondentes a diferentes municipios da provincia da Coruña.
A actuación no lugar da Cancela de Abrea, publicada na Plataforma de Contratación do Estado, conta cun orzamento de 47.374,15 euros. O investimento no Concello de Dodro inclúe a canalización de 220 metros de tubaxe de PVC, a construción de 8 pozos de rexistro e a instalación dunha rede de impulsión de 650 metros, que irá acompañada dun pozo de bombeo. Ó finalizar a obra, procederase á rehabilitación da zona, que inclúe a restauración do pavimentado afectado.
