A Mesa pola Normalización Lingüística informou do comezo da recollida de sinaturas para a iniciativa parlamentaria popular Xabarín. Na campaña están a colaborar máis de 250 establecementos de todas as nosas comarcas, incluída a do Barbanza, recadando rúbricas para a dita iniciativa parlamentaria que, como lembraremos, busca mellorar a programación infantil e xuvenil en galego e acompañar estas melloras cunha aplicación móbil da TVG con contidos de calidade na nosa lingua. Polo Barbanza participan dezasete locais, unha vintena se incluímos Muros e Carnota.
Están dispoñíbeis para a recollida de sinaturas os seguintes establecementos: por Ribeira a Libraría Arigató, a Cafetería Cocoluche, a Cafetería Albatros, Tapería Cocoluche a a tenda-bar A de Ramona, en Artes. Na Pobra contribúen a Libraría Ler e A de Rosa. En Boiro fano a xoguetería Toy Club, a Libraría García, Sargadelos Boiro, a Libraría Nobel e máis a Farmacia Susana Blanco Alcalde. En Rianxo están a colaborar Don Dino e o Bar Atalalia. En Porto do Son o Bar Xavi e en Noia e Outes A Agra de Noé (tenda ecolóxica) e máis Cermanx Outes.
A web da Mesa recolle nun mapa a localización dos puntos de recollida de sinaturas, co obxectivo, en palabras da plataforma, de “facilitar o labor das persoas que queiran apoiar a petición de que a CRTVG aumente a oferta en galego destinada á infancia e á mocidade nas televisións públicas a través dunha canle Xabarín, con programación atractiva, actual, educativa e de produción galega dirixida ao público infantil e xuvenil e dispoñíbel en todas as plataformas dixitais, así como nunha app actualizada que conten ademais con programas e xogos”.
A proposta tamén insta ao Goberno galego a “adoptar as medidas e accións precisas para garantir a opción dobrada e lexendada ao galego nas plataformas dixitais e que TVE emita con opción dobrada ao galego todos os contidos da súa canle infantil e xuvenil e da súa aplicación móbil para o público infantil”. O Goberno galego deberá tamén adoptar as medidas necesarias que permitan a recepción mutua RTP – TVG en Galiza e Portugal segundo o contemplado na Carta Europea de Linguas Rexionais ou Minoritarias.
A petición, que reuniu a través da web preto de 15000 sinaturas, chega deste xeito á fase de recollida física de apoios, “imprescindíbel para o trámite parlamentario”, explicou a entidade impulsora da iniciativa.
