Os casos de coronavirus están desbocados en Ourense, disparados en Santiago e estables nas demais áreas sanitarias.
Galicia detectou 405 contaxios por coronavirus nas últimas 24 horas, o que supón volver superar por segundo día consecutivo a barreira dos 400 e situarse en cifras de finais de marzo, ao comezo da pandemia. Case a metade dos novos infectados, un total de 191, concéntranse na área sanitaria de Ourense.
Ademais, segundo a última actualización do novo portal da Consellería de Sanidade para informar sobre a incidencia da COVID-19, a Comunidade galega sumou un novo falecemento nas últimas horas, o que sitúa a cifra total en 780. En concreto, a última vítima é unha muller de 93 anos que morreu na residencia de maiores Ballesol do concello de Oleiros.
En canto ás altas, nas últimas 24 horas producíronse 319 –73 máis que o día anterior– e o total de persoas curadas desde o inicio da pandemia é de 21.425.
A segunda área con máis contaxios diarios, 65 nas últimas 24 horas –fronte ás 49 do día anterior–, é a de Santiago e Barbanza, que conta con 581 pacientes de COVID-19. Na comarca faleceron desde o inicio da pandemia 120 persoas.
En Galicia hai un total de 21.425 pacientes curados. A día de hoxe hai 4.146 pacientes en seguimento nos seus domicilios. O Sergas ten a disposición da cidadanía a páxina web coronavirus.sergas.gal, na que se pode consultar a información dirixida á poboación, aos profesionais sanitarios e a outros colectivos