Boiro celebra as aprazas Letras Galegas

28 Outubro 2020

O Concello de Boiro, a través do departamento de Cultura, e xunto coa
Asociación Cultural Barbantia, preparan unha programación especial para
conmemorar o Día das Letras Galegas 2020 que, por mor da Covid-19 non se
puido celebrar o 17 de maio e se adiou ao 31 de outubro. A concelleira de
Cultura, María Outeiral, o presidente da A.C. Barbantia, Manuel Cartea, e o
técnico de Cultura, Alberto García falaron esta mañá sobre a programación.
O Concello de Boiro festexou xa en maio as Letras Galegas cunha
programación especial na rede. Xunto con Barbantia preparan agora unha
programación, con prazas limitadas e seguindo todas as medidas de
seguridade, para os días 30 e 31 de outubro. O venres día 30, ás 20.30 horas
no local Leñaverde do Centro Social de Boiro, vaise realizar a presentación do Premio Torrente Ballester 2019, o libro “O paraíso dos inocentes” de Antón Riveiro Coello, na que intervirá o autor, a vicepresidenta da A.C. Barbantia, María Xesús Blanco; o vogal da Asociación, Xesús Laíño; o deputado provincial de Cultura, Xurxo Couto; e o alcalde de Boiro, José Ramón Romero. Ademais da presentación, haberá unha actuación da Escola de Ballet Cen Pliés de Boiro.
O sábado 31de outubro vaise facer, ás 17.00 horas, a presentación do
libro “Ricardo Carvalho Calero. A pegada do compromiso” de Héctor
Cajaraville, na que intervirán Milagros Torrado e José Ramón Romero. Ás
17.45 horas vaise realizar a presentación do libro “Foula e Ronsel. Os anos que marcaron a biografía de Carvalho Calero (1911-1941)” de Aurora Marco, na que intervirán Xesús Laíño e a concelleira de Cultura, María Outeiral.
Ás 19.00 horas continúa a programación coa actuación infantil de Os
Monifates e ás 19.40 horas actuación do grupo Xilbarbeira. As prazas para
todas as actividades son limitadas, polo que se require inscrición previa. As inscricións para a presentación literaria do venres e as actuacións musicais do sábado deben facerse no enderezo electrónico reservacultura@boiro.gal e as inscricións para as presentacións literarias do sábado deben facerse no
enderezo electrónico pastor@barbantia.es .
A concelleira, María Outeiral, insistiu na importancia de manter as actividades culturais “para afrontar a difícil situación que estamos a vivir. A
cultura tamén pode ser segura e, dende o Concello, queremos seguir
apostando por ela a por todos os profesionais do sector”.

Outros artigos

Publicidade

Revista en papel

Opinión