O Concello de Boiro compartiu a súa axenda cultural para estes días, un menú de teatro e contacontos que pon o punto de mira na rapazada e en estimular a súa creatividade e o seu espírito participativo. O programa comeza este mércores co espectáculo O Xigante, de Elefante Elegante, que está previsto para as 20.00 horas no Centro Social de Escarabote. Trátase dunha peza en pequeno formato para público infantil (de 3 a 8 anos) da compañía Elefante Elegante. As prazas son limitadas. A reserva de entradas pode facerse no enderezo electrónico reservacultura@boiro.gal ata as 13.00 horas do 07/10/2020.
O día 9 de outubro prosegue o teatro con Mai Mai da compañía Baobab. Será ás 20.00 horas na Casa da Cultura de Boiro. Mai Mai é unha historia que busca a concienciación medioambiental e o empoderamento da muller.
A festa dos relatos non remata a fin de semana, e continúa da man da escritora e narradora oral María Canosa, que o sábado ofrece o espectáculo Contacontos para nenos e nenas, ás 12.00 horas na Casa da Cultura de Boiro. Na mesma xornada do sábado, xa pola tarde, ás 17.00 horas, é a quenda da tamén narradora Raquel Queizás, que estará no Centro Social de Cabo de Cruz para achegar á rapazada O segredo do tendal. As prazas serán novamente limitadas. A reserva de entradas pode facerse enderezo electrónico reservacultura@boiro.gal antes das 13.030 horas do 09/10/2020.
