A Mancomunidade Barbanza Arousa está a desenvolver un proxecto de creación de rutas náutico-terrestres en colaboración con AGAN+ (Asociación Galega de Actividades Náuticas). Esta iniciativa ten o obxectivo de “incrementar a competitividade” do noso xeodestino grazas ao patrimonio natural e cultural que atesouran os nosos concellos, o noso tecido produtivo e o noso litoral. A fórmula para facer medrar as visitas e o que se vén chamado fidelización serán os itinerarios náuticos e terrestres. Tamén se busca acadar “un efecto multiplicador nos demais sectores da zona”.
Logo dunha primeira fase de análise, a mancomunidade estase a mergullar na valorización do patrimonio marítimo terrestre a través do desenvolvemento dunha aplicación tecnolóxica de Realidade Aumentada, ao mesmo tempo que crea “produto” involucrando a todos os axentes do territorio e a operadores de turismo referenciais.
Ao abeiro do proxecto está prevista a realización de workshops que teñen como obxectivo crear sinerxías entre empresas do sector náutico e entidades de servizos complementarios, así como axencias de viaxes receptivas para crear produtos turísticos con maior valor engadido.
Por parte do ámbito náutico, as empresas convocadas a participar son navieiras, empresas náuticas con embarcacións a motor e vela, empresas de actividades como kaiak, submarinismo, paddle surf etc.
En canto a empresas turísticas son chamadas a participar neste obradoiro aloxamentos, empresas de restauración, turismo activo, empresas de transporte (taxis, buses, aluguer de vehículos), museos, guías turísticas e outras firmas de servizos complementarios como adegas visitábeis, centros de saúde e benestar, campos de golf, comercios de artesanía e produtos locais gourmet, etc.
O primeiro workshop celebrarase o vindeiro o martes 27 de outubro en horario de 17:00 a 19:00 horas. Para participar é necesario inscribirse na ligazón específica habilitada en liña.
