A Pobra repite por terceiro ano consecutivo o programa “Espazos das Familias”

20 Outubro 2020

A terceira convocatoria do programa Espazos das Familias chega á Pobra do Caramiñal da man do Concello e a Asociación Socioeducativa Antonio Gandoy. Dirixida a familias con crianzas con idades comprendidas entre os 0 e os 3 anos, a referida actividade desenvolverase ao longo de todo o período escolar sen ningún tipo de custo para as persoas participantes. As sesións terán lugar os martes, en horario de 11.30 a 13.00 horas, e iniciarán xa a vindeira semana, na casa da cultura e xuventude Raquel Fernández Soler. As encargadas de debulla-lo contido desta cita foron a concelleira dos Servizos Sociais, Amparo Cerecedo (BNG), e a responsable do proxecto na comarca e membro da mencionada asociación, Olaia González, acompañadas de varias familias e da educadora familiar do Concello, Lidia Martínez.

“Espazos das Familias”. A Pobra

A edil explicou, máis polo miúdo, que este proxecto sociopedagóxico cun
aspecto lúdico ten como principais finalidades “dotar de ferramentas educativas os pais e nais e comparti-las vivencias sobre a crianza”, pois fixo fincapé en que “o compartir e socializar son obxectivos tan importantes neste momento.” Así mesmo, apuntou que a inscrición non é pechada, polo cal calquera familia que se anime a participar nela pode facelo ao longo de todo o período lectivo, mais establécese un máximo de cinco unidades domésticas asistentes (cinco persoas adultas e cinco cativos e cativas), debido á situación sanitaria. De se producir unha maior demanda, valoraranse outras alternativas para o seu desenvolvemento, xa que sinalou que “dende o Concello pensamos que esta é unha actividade fundamental e socializadora nun momento de pandemia.”
Tamén quixo animar toda a veciñanza a tomar parte dela, pois incidiu en que “é unha actividade moi segura” ao seguirse no seu transcurso o protocolo e medidas implantadas por mor da COVID-19.
Pola súa parte, Olaia González remarcou que se vai “compartir experiencias, aclarar dúbidas sobre a educación e facer diferentes actividades cos nenos e as nenas encamiñadas a desenvolver distintas áreas.” Respecto ao curso pasado, especificou que haberá que se adaptar á nova situación, pero cun protocolo específico de actuación e extremando as medidas hixiénico-sanitarias. Ademais,manifestou que, de se producir un confinamento ou corentena, se non se lle pode dar continuidade a este espazo de maneira física será virtual. Do mesmo xeito, este ano as titorías individualizadas transcorrerán telefonicamente.

“Espazos das Familias”. A Pobra

As familias interesadas poden cubri-la ficha de inscrición nos Servizos Sociais do Concello.  
Unha vez concluído o acto de presentación, as familias asistiron a un
contacontos da man de Jorge Rey con Güe-güe, unha actividade de animación con música, teatro e danza, enmarcada dentro do programa Ler conta moito e que tivo lugar na biblioteca municipal.

Outros artigos

Todo preparado na Pobra para 16ª edición da Volta a Ons

A Pobra do Caramiñal, a través do Club Náutico Arousa Norte, comezou a conta atrás para a 16ª edición da Volta a Ons. A clásica regata que organiza o Club Arousa Norte, puntuábel para a Copa Xunta de Galicia, conta co patrocinio do Clínica Dr. Gonzalo López e de...

+

Publicidade

Revista en papel

Opinión

“Cando existen intereses contrapostos na pesca”. Antón Luaces

“Cando existen intereses contrapostos na pesca”. Antón Luaces

Dicirmos que hai diverxencia entre o sector pesqueiro e os gobernos (autonómico e/ou central) non é descubrir, arestora, o Atlántico. Resulta tan evidente ese desencontro, que só a desunión permanente no eido da pesca marítima explica que o sector, en Galicia e as...