O PEFC Galicia, a Xunta, o COETFG e a UVigo organizan este 30 de outubro un seminario online sobre unha cuestión que colle moi de preto aos propietarios de montes e ás mancomunidades dos nosos concellos: a cuestión dos montes veciñais e e como convertelos, apostando pola rendibilidade e polo ecolóxico, en explotacións sustentábeis. Na sesión, na que vai participar Ovidio Queiruga González, presidente da Comunidade de Montes Veciñais de Baroña, tamén se abordarán cuestións como a ordenación e a certificación e, tamén, temas específicos de rendemento como a explotación da resina.
A xornada comeza ás 10.00 horas cunha sesión de apertura a cargo de Enrique Valero Gutiérrez del Olmo, presidente do PEFC Galicia, que dará paso a Odón López López, da Dirección Xeral de Planificación e Ordenación Forestal, quen falará das novidades en materia de regulamento a aproveitamentos dos montes. Tamén intervirán Arantza Pérez Oleaga (responsábel de Xestión Forestal Sustentábel do PEFC España), Xana Álvarez Bermúdez (da Escola de Enxeñaría Forestal de Pontevedra), Ismael Olveira Lema (secretario da Fundación Arume e director de Negocio Madeira Maciza na compañía FINSA) e Juan Carlos Álvarez Cabrero (Premio Nacional de Desenvolvemento Rural Sustentábel).
