Representantes comarcais do Bloque Nacionalista Galego reuníronse este martes 29 cos integrantes da Plataforma en Defensa da Sanidade da Barbanza co obxectivo de analizar os problemas do sistema de saúde na nosa contorna. Na reunión estivo presente a deputada do BNG Rosana Pérez, acompañada da responsábel comarcal Elvira Branco, do alcalde rianxeiro Adolfo Muíños, o voceiro do BNG en Porto do Son Balbino González, do concelleiro ribeirense Luís Pérez. A raíz do falado e do acordado, os nacionalistas reclamaron garantir “unha atención presencial segura” e rematar coas listaxes de espera.
Na xuntanza a plataforma trasladou á agrupación nacionalista algunhas das súa principais reclamacións, como por exemplo a necesidade de contratar máis persoal en determinadas especialidades, solucionar a falta de espazo no Hospital da Barbanza, pór freo ao deterioro que sofren os centros de saúde das parroquias ou acadar máis transparencia en materia de informes relativos á evolución da COVID-19.
A deputada nacionalista, Rosana Pérez, avanzou que trasladará estes temas ao Parlamento galego para esixir á Xunta que “cubra as necesidades de persoal existentes e unha dotación suficiente de material sanitario”. Pérez Fernández cualificou de “especialmente grave” que os centros de saúde de Taragoña e Cabo de Cruz “aínda non abrisen as súas portas”, o que para a nacionalista, demostra “o interese da Xunta no desmantelamento da atención sanitaria de proximidade”. O BNG tamén se preocupou pola a situación de abandono que sofren os de Aguiño, Palmeira, Corrubedo e Xuño, en maior medida, ou pola falta de profesionais nos centros de saúde de Boiro, A Pobra e Ribeira.
Pérez Fernández avanzou que reclamará á Xunta accións inmediatas para, nas súas palabras, “garantir a atención presencial segura e rematar coas listas de espera en atención primaria e aumentar o orzamento destinado a primaria no inmediato 200 millóns de euros”. Por último, agradeceu o traballo dos membros da Plataforma da Sanidade e quedou á súa disposición para trasladar as súas demandas ao Parlamento.
