A Praza do Concello de Dodro acolle a exposición “Dodro, Muller e Deporte”, unha iniciativa das áreas de Igualdade e Deportes onde se pretende dar a ver o deporte feminino de Dodro o longo dos anos. Para iso no mes de xullo fíxose unha recollida de fotografías coa participación de mais dunha vintena de mulleres, onde se percorre o período dende os anos setenta até a actualidade.
Estas coirenta e cinco imaxes están expostas no interior da Casa do Concello. Participaron nesta presentación, ademais das protagonistas, diversas persoas relacionadas co deporte de Dodro, como os representantes do C.D. Dodro de fútbol e do xa desaparecido Bacelos de voleibol.
A continuación da presentación iniciouse un interesante debate entre as persoas asistentes moderado polo persoal técnico das dúas áreas, onde se profundou no avance da igualdade real entre mulleres e homes no mundo deportivo, e nas eivas que a día de hoxe aínda existen.
O Concello de Dodro é un referente en políticas de igualdade, dende fai moitos anos se está a traballar nunhas liñas estratéxicas trazadas en diferentes Plans de Igualdade, iniciados no ano 2004 e executados polos diferentes gobernos municipais, mantendo e potenciando o compromiso coa igualdade de oportunidades e a loita contra a violencia de xénero.
O deporte pola súa potencialidade educativa e nos medios constitúe un motor de cambio social importante e contribúe desde fai tempo a promover a igualdade real entre mulleres e homes e avanzar cara unha sociedade máis xusta e igualitaria.
