A Policía Local de Rianxo formalizou definitivamente o seu traslado á rúa Rosalía de Castro, concretamente ao número 2 do dito viario, trala igrexa da Guadalupe. As novas instalacións, que foron presentadas nos seus detalles hai meses, teñen 201 metros de superficie e constan dun andar baixo, que se destina a atención ao público, e un primeiro piso, restrinxido para o traballo dos axentes, que están comunicados entre si a través de escaleiras e dun ascensor.
As obras realizáronse ao abeiro do Plan Único (Deputación da Coruña e Concello de Rianxo) por importe de 108.000 euros e incluíron, adicionalmente, rede de transmisións e antenas, equipamento informático, enreixado e mobiliario. O obxectivo foi pór en xogo “unhas instalacións máis modernas e operativas”. Neste días realizou o troco de materiais e equipos e comezou a andaina na nova sede. O teléfono de atención non muda: 981 860 625.
