Rianxo foi escenario esta mañá da inauguración da nova sede da Policía Local, na céntrica rúa Rosalía de Castro, moi preto da igrexa da Guadalupe. Ao acto asistiron o presidente da Deputación da Coruña, Valentín González Formoso; o rexedor da localidade, Adolfo Muíños; a primeira tenente de alcalde, María del Carmen Figueira; o coronel xefe da Comandancia da Garda Civil na Coruña, Francisco Javier Jambrina; e representantes da corporación municipal rianxeira; entre outros.
Así, percorreron os 201 metros cadrados do inmoble, que acolle as novas e modernas dependencias nas que desenvolverán o seu traballo cotián os policías municipais do Concello de Rianxo. O edificio consta dun andar baixo, que se destinará a atención ao público, e un primeiro piso, restrinxido para o traballo dos axentes, que están comunicados entre si a través de escaleiras e dun ascensor. O traslado a esta nova instalación está programado para o mes de xaneiro de 2020. Ademais, nas paredes colocáronse fotografías que fan unha pequena escolma da historia do corpo da Policía Local desde a súa creación.
No seu discurso inaugural, Valentín González Formoso destacou que o edificio, unha das 1.700 obras financiadas polo Plan Único nos 93 concellos coruñeses, supón “un exemplo máis da utilidade deste plan para mellorar as infraestruturas e os servizos municipais.” Neste senso, manifestou que se cumpre cunha vella demanda da Policía Local e do alcalde de Rianxo, dotando dun equipamento público novo, individual, independente e con tódalas comodidades e modernidades, algo “esencial na vida de calquera municipio.”
Do mesmo xeito, o presidente da Deputación expresou o seu agradecemento á corporación municipal pola colaboración e subliñou que nos últimos catro anos, só a través do Plan Único, a institución provincial leva investido ao redor de 4 millóns de euros en Rianxo.
Pola súa banda, o rexedor Adolfo Muíños, agradeceu a presencia de Valentín Formoso e afirmou que “hai un antes e despois da implantación do Plan Único para os concellos.” Engadiu que “o esforzo da Deputación para dotar de fondos vese en infraestruturas coma esta.” Tamén aproveitou a ocasión para agradecer a asistencia do anterior xefe da Policía Local, quen vén de xubilarse recentemente e “que pelexou para ter unha sede digna.” Adolfo Muíños anunciou que se desenvolverán máis intervencións no municipio que contribúan a dignificar ou axudar ás melloras dos servizos para a cidadanía de Rianxo, lembrando que as obras do arquivo municipal verán a luz ao longo do 2020.
As obras de adaptación do inmoble, financiadas integramente pola Deputación, incluíron a limpeza e revestimento exterior e interior da fachada; a renovación completa da carpintería exterior; a instalación dos sistemas de saneamento, electricidade, fontanería e telecomunicacións; a mellora da accesibilidade coa colocación dun ascensor para conectar as dúas plantas do edificio; a dotación de sistema antiincendios; e o sistema de calefacción que funciona con enerxía solar 100% sostible grazas a dous captadores solares de alto rendemento instalados na cuberta do edificio.
