Paisaxes Sonoras chega a un dos seus puntos culminantes con Triángulo de Amor Bizarro e Carlos Blanco

Tralo adiamento ao domingo da actuación de Carlos Blanco, esta fin de semana convértese no eixo central do ciclo Paisaxes Sonoras, o programa de concertos da Mancomunidade Arousa-Barbanza destinado a reivindicar a nosa cultura e identidade mediante un diálogo transversal entre música, narración, paisaxe e patrimonio. Será un menú de dúas actividades, a primeira das cales dará comezo o sábado coa banda local Triángulo de Amor Bizarro, que interpretarán os temas do seu disco homónimo a partires das 20.00 horas a carón da Praia Pesqueira en Cabo de Cruz (Boiro).

Segundo informa a organización, “as entradas de Triángulo de Amor Bizarro están esgotadas e o recinto contará cun reforzo no control externo para evitar aglomeracións dada a alta expectación que xerou o concerto, que esgotou as entradas en tan só 30 minutos”.

O domingo será a quenda Carlos Blanco co seu espectáculo Os mellores monólogos. Tamén coas entradas esgotadas, a cita é as 20 h no Pazo de Rianxiño.

A derradeira das Paisaxes Sonoras será o 29 de agosto na antiga Fábrica de Salgadura de Castiñeiras (Ribeira), coa cantante galega Guadi Galego.

Boiro: A praia de Pesqueira

A praia da Pesqueira atópase na pequena vila mariñeira de Cabo de Cruz. No seu porto, explica a mancomunidade, “conviven pasado e presente, desde o novo porto pesqueiro ao peirao vello, un dos máis antigos da ría que atesourou embarcacións que repasan a historia mariñeira de Galicia, como son as lanchas xeiteiras, as dornas de tope, os balandros, as traíñas ou as gamelas, entre outras”.

Rianxo: O hórreo do Pazo Rianxiño

Carlos Blanco actuará baixo a sombra do Hórreo de Rianxo. De pedra na súa totalidade, é o segundo en importancia no municipio e ten como particularidade a súa cuberta de granito a dúas augas. Cos seus case 25 metros de longo, tardou aproximadamente 10 anos en ser construído. Preside maxistralmente a Ruta do Mar de Arousa e Ulla.