O vindeiro martes 1 de setembro presentarase en Porto do Son, no Centro de Interpretación do Castro de Baroña (antigo concello), un programa dirixido a garantir o relevo xeracional no sector pesqueiro, unha cuestión socioeconómica que se presenta como un dos grandes retos das nosas administracións para os vindeiros anos. Estamos a falar do proxecto Relevo 2020, que se dá a coñecer en formato de reunión informativa (coas máis estritas medidas de seguridade) a partir das 19.00 horas. Relevo 2020, para quen non o saiba, é un chamamento á mocidade a identificarse co mantemento e desenvolvemento da actividade ligada ao mar, a través de formación, encontros, asesoramentos e actividades que contribúan ao mellor coñecemento dos recursos do noso litoral.
Baixo o nome de Relevo 2020, trátase dunha unha iniciativa de carácter formativo promovida por cinco Grupos de Acción Local do Sector Pesqueiro (GALP): GALP A Mariña – Ortegal, GALP Golgo Ártabro Norte, GALP Golfo Ártabro Sur, GALP Seo de Fisterra Ría de Muros Noia Costa Sostible e GALP Ría de Arousa.
As persoas interesadas en asistir á reunión de Porto do Son deberán poñerse en contacto coa organización a través do enderezo electrónico jose.pazo@portodoson.gal.
O programa está dirixido a mozas e mozas entre os 16 e os 30 anos e posúe os seguintes obxectivos:
• Facilitar espazos de posta en común, en relación ao sector pesqueiro, para mozas e mozos do territorio que teñen inquietudes e obxectivos comúns e moito que aportar nos eidos pesqueiro e social.
• Sensibilizar aos mozos na importancia que o sector pesqueiro ten no desenvolvemento territorial e a súa repercusión no patrimonio, desenvolvemento turístico e oferta gastronómica.
• Continuar apoiando a profesionalización do sector pesqueiro e fomentando a innovación para que se siga a manter como un motor da nosa economía a través da creación de emprego, apoio á empregabilidade e/ou da inclusión social.
• Poñer de manifesto a importancia de preservar os recursos e zonas costeiras e de loitar en contra do cambio climático.
O programa formativo levarase a cabo entre setembro de 2020 e abril de 2021 con dúas edicións: a primeira entre setembro e decembro de 2020 (cuadrimestre 1) e a segunda, entre xaneiro e abril de 2021(cuadrimestre 2). Ambas son independentes. Haberá 15 prazas en cada cuadrimestre (30 prazas en total para cada GALP).
