O Concello de Porto do Son impulsou este mes de abril novas frontes de traballo nas parroquias e nos núcleos tradicionais dirixidos a acondicionar accesos e infraestruturas, mellorar servizos, impulsar os tesouros turísticos e garantir a seguridade, traballos dos que foi dando conta puntualmente nas redes sociais. As obras puxeron o foco no sendeiro litoral que está preto de cubrir toda a costa do territorio sonense (actuouse no treito de Seráns, na pasarela de madeira que bordea a praia) ou na rede de saneamento que se quere habilitar en todos os núcleos, actuando este mes na parroquia de Xuño.
Amais, traballouse para mellorar as estradas e os accesos, por exemplo en Carballosa (San Pedro) ou na contorna do Campamento da Virxe do Loreto. A maiores contouse coa colaboración do alumnado do programa de emprego Tahume IX, que puxo a punto diversos espazos naturais e sendas.
-En Seráns (San Pedro de Muro) avanzaron os arranxos da pasarela costeira.
-En Xuño avanzouse na acometida do saneamento para cubrir toda a parroquia.
-En Carballosa (San Pedro) as brigadas municipais acondicionaron os accesos ao núcleo.
-En Miñortos, o Concello traballou para solucionar as perdas de auga da rede.
-Nas parroquias de Caamaño e Xuño acondicionáronse os accesos.
-O alumnado do obradoiro de emprego Tahume IX puxo a punto as sendas verdes que conectan o alto de Olveira con Coira, en Goiáns, e A Arnela co Castro de Baroña.
-Acondicionáronse os accesos do Campamento Xuvenil Virxe do Loreto e da zona de lecer.
