Unha orde da Consellería de Sanidade publicada no Diario Oficial de Galicia prohibe desde este xoves fumar na vía pública e nas terrazas dos locais de hostalería se non se pode garantir a distancia de seguridade de dous metros. A medida englóbase no paquete de restricións que puxo en marcha o Goberno galego para frear a propagación do coronavirus, coa condición de que se aplicará en toda Galicia e non soamente na área sanitaria da Coruña, actualmente o territorio máis afectado polo Covid-19.
Sanidade especifica que a única excepción ao uso obrigatorio da máscara na vía pública e ao aire libre para fumar será cando poida garantirse a distancia de dous metros de seguridade.
O presidente da Xunta explicou este mércores que os expertos consideran que o fume do tabaco é un factor de difusión” do virus. Algúns dos membros do comité clínico coinciden en que fumar sen limitación nunha terraza con persoas próximas ou en zonas sen distancia é un risco alto de infección.
