A Marea de Noia vén de compartir a súa vontade de colaborar co Concello para “desbloquear os pagamentos ás empresas provedoras e o uso do remanente”. A decisión de tenderlle a man ao alcalde Santiago Freire por parte da dita agrupación foi tomada logo de que no pasado pleno o Goberno local non puidese sacar adiante o pago por máis de 300.000 euros en facturas sen consignación orzamentaria, debido, lembra a Marea, “aos votos en contra da oposición e á abstención do seu socio de goberno”.
En base a isto, o grupo vén de solicitar unha xuntanza coa alcaldía para avanzar no dito desbloqueo, poñendo o foco na existencia “dunhas bases claras para un acordo”, que teñen que ver, engade, “cun principio claro de transparencia, unha aposta pola conciliación e en prol de romper coa fenda dixital”.
Estes serían os alicerces do diálogo:
1.Remitir mensualmente a relación de facturas rexistradas no Concello ao noso grupo municipal.
2.Modificar as Bases de Execución do Orzamento, o Goberno terá que pedir obrigatoriamente
3 Orzamentos antes de adxudicar unha obra ou servizo maior de 1.500 euros.
3.Dotar con 50.000€ a creación dun Plan de Conciliación Municipal que garanta a prestación de servizos durante o curso escolar e adquisición de tabletas e conexión á Rede.
4.Licitación pública do contrato para o mantemento do alumeado público e de roces.
5.Solicitar as axudas da Deputación da Coruña para empresas.
