A Plataforma Stop Deshaucios Barbanza que coordina dende Ribeira o noso colaborador José Manuel Pena vén de poñernos ao tanto dun novo e relevante caso de solidariedade coa poboación máis vulnerábel da nosa comarca, un sector que en moitos casos concretos viu agravada a súa situación coa chegada do Estado de Alarma e o confinamento. As contribucións solidarias ás que alude a plataforma viñeron da man da conserveira ribeirense Ignacio González Montes e máis a empresa compostelá Distribucións JB Cao.
Foron, concretamente, doazóns de produtos alimentarios que, segundo indica Stop Deshaucios Barbanza, xa foron repartidos o pasado venres entre 53 familias vulnerábeis da nosa comarca, principalmente de Ribeira, Boiro e Noia.
Por certo que o labor humanitario da conserveira de Ribeira deixouse notar tamén nos momentos máis críticos da emerxencia sanitaria, co reparto de alimentos, en abril, a outras tantas familias en risco.
