O Concello de Rianxo compartiu novamente a súa programación cultural para estes meses estivais de 2020, unha axenda adaptada aos tempos COVID para cuxa elaboración fíxose un especial esforzo por evitar actividades que puxeran en risco á poboación ao mesmo tempo que se tentaron ofrecer citas destacadas para ser subliñadas no calendario e que foran de interese para todas as idades e gustos. Haberá cinema, libros, astronomía e música, entre outras cousas.
O programa de actividades do verán comezou os días pasados (o 3 e o 4 de xullo) co Encontro Internacional Zona da Zanfona, que achegou concertos e encontros de pequeno formato para mostrar ante os participantes nas sesións a importancia musical (e histórica, artística, cultural, narrativa) dun instrumento tan de noso como a zanfona. Organizou aCentral Folque en colaboración co Concello de Rianxo.
A axenda continúa na fin de semana do venres 17 e o sábado 18 de xullo, coas proxeccións cinematográficas seguras da iniciativa Lúa Chea no Barbanza, impulsada pola Mancomunidade de Municipios Arousa Norte (Ribeira, A Pobra, Boiro e Rianxo) para achegar lecer audiovisual a residentes e visitantes baixo unha fórmula que fai compatíbeis os protocolos sanitarios máis esixentes coa diversión e a orixinalidade. A proposta recala o venres e o sábado en Rianxo. Farao ás 20h30 con Cinema Paradiso (cinema clásico) e ás 23h30 con O que arde (cinema galego). O sábado 18 de xullo, ás 20.30 horas, retómanse as proxeccións con O Cid (cinema familiar) e ás 23.30 horas La Biblioteca de los libros rechazados (cinema actual).
Días despois, do xoves 23 ao domingo 26 de xullo as escritoras e os escritores tomarán a palabra. Falamos da nova edición da Feira do Libro de Galicia, que recala en Rianxo cun programa seguro de actividades (libros, actividades literarias, presentacións e sinaturas) no Campo de Arriba). O pregón (o día 23 ás 13.00 horas) correrá a cargo do escritor local Ricardo Losada, autor da recente novela de éxito A casa xunto ao volcán, publicada por Galaxia. O horario da Feira do Libro de Rianxo é o seguinte: de 12.00 a 14.00 (fin de semana de 12.00 a 14.30) e de 18.30 ás 22.30. Medidas de control: dous visitantes por caseta ao mesmo tempo. Desconto do 10% na venda en feira. Máis información en: http://www.librarias.org/axenda_eventos/feira/. Organiza: Federación de Librarías de Galicia. Colaboran: Concello de Rianxo, Xacobeo 21 (Xunta de Galicia), Deputación da Coruña, Industrias Cortizo.
De xeito simultáneo á Feira do Libro chegará a Rianxo outra importante actividade: o Congreso A astronomía nas rutas xacobeas. Celebrarase en dúas quendas: o venres 24 de xullo, ás 20.45 horas, e o martes 25 de agosto, ás 21.00 horas. Organiza Rianxo Ciencia, a Universidade de Santiago e mailo Concello. Haberá, no Centro Sociocultural – Auditorio de Rianxo, relatorios e tamén observacións do firmamento. As persoas interesadas en acudir terán que reservar praza a través do correo electrónico auditorio@concelloderianxo.gal (preferente) ou facelo a través do teléfono 664 18 32 17. As reservas para a sesión do venres 24 deberán facerse entre o mércores 15 e o venres 23 (de 9 a 13.30 horas) e as da sesión do martes 25 entre o xoves 13 e o luns 24 (no mesmo horario).
Para quen queira mergullarse na tradición xacobea da comarca a través dunha moi interesante exposición, dicirlle que está habilitada dende o 26 de xuño, no Auditorio, a mostra itinerante As pegadas do Camiño de Santiago no Barbanza: A Orixe, impulsada pola Asociación de Amigos do Camiño de Santiago do Barbanza e Sar. Trátase dunha mostra divulgativa e de carácter itinerante, enfocada en dar a coñecer o ronsel do patrimonio cultural, histórico e artístico presente no itinerario terrestre deste camiño xacobeo, en proceso de recuperación e posta en valor, por iniciativa desta entidade asociativa: Amigos do Camiño. A exposición reflicte por medio de fotografías as evidencias históricas da ruta xacobea entre Corrubedo e Santiago. A autoría das imaxes achegadas é de Adolfo Enríquez, fotógrafo do Barbanza. O comisario da mostra é Antonio González Millán, documentalista, xestor cultural e autor de proxectos de desenvolvemento e dinamización nos ámbitos galego e nacional, cunha ampla bagaxe en promoción cultural (de Barbanza, de Galicia) a través de publicacións, relatorios, colaboracións de prensa, etcétera. A exposición conta co patrocinio da Xunta (a Consellería de Cultura a través de O Teu Xacobeo) e a colaboración do Concello de Rianxo.
Para os seareiros da música, do xoves 6 ao sábado 8 de agosto celébrase a cuarta edición do Festival Noites de Jazz de Rianxo. Será no Centro Sociocultural-Auditorio ás 22.30 horas (actividades con reserva previa). Xoves 6, Pablo Sanmamed Trío. Venres 7, Pablo Castanho Quartet. Sábado 8, Swing Machine Orchestra. Organiza: Concello de Rianxo. Colabora: Deputación da Coruña. Museo de Artes do Gravado á Estampa Dixital (Ribeira).
O venres 14 de agosto o cinema ao aire libre volve ser protagonista. Será na praza Castelao ás 22.30 horas, coa proxección da película María Solinha (estrea), un filme de Ignacio Vilar (Vía Láctea Filmes e TVG). Organiza: Concello de Rianxo. Colabora: Deputación da Coruña.
O sábado 22 de agosto retomamos o fío da música, cun concerto de Barahunda no Centro Sociocultural-Auditorio ás 22.30 horas. Trátase dunha actividade con reserva previa. Organiza: Barahunda. Colabora: Concello de Rianxo.
O programa cultural compleméntase coa Mostra Arte-sanía en Ondiñas Mainas. Será do 21 de Agosto ao 18 de setembro, na sala de exposicións do Centro Sociocultural-Auditorio. Organiza a Asociación Cultural Ondiñas Mainas. Colabora: Concello de Rianxo.