Logo do aprazamento derivado da declaración do Estado de Alarma, que obrigou a que a exposición itinerante As pegadas do Camiño de Santiago no Barbanza: A Orixe adiase a súa inauguración en Rianxo, retómase estes días a actividade da mostra, impulsada pola Asociación de Amigos do Camiño de Santiago do Barbanza e Sar, e a propia actividade da asociación. Segundo nos contan fontes da entidade, a exposición recalará finalmente este venres 26 de xuño no Auditorio de Rianxo.
Trátase dunha mostra divulgativa e de carácter itinerante, enfocada en dar a coñecer o ronsel do patrimonio cultural, histórico e artístico presente no itinerario terrestre deste camiño xacobeo, en proceso de recuperación e posta en valor, por iniciativa desta entidade asociativa: Amigos do Camiño.
A exposición reflicte por medio de fotografías as evidencias históricas da ruta xacobea entre Corrubedo e Santiago, percorrido que foi presentado en sociedade o 19 de decembro de 2019 en Compostela e de cuxa peregrinaxe deron conta o 6 de marzo deste ano en Corrubedo.
A autoría das imaxes achegadas é de Adolfo Enríquez, fotógrafo do Barbanza, galardoado con numerosos premios dos ámbitos nacional como internacional, amais de ser un profesional con ampla experiencia na promoción exterior de Galicia a través de traballos editoriais e expositivos.
O comisario da mostra é Antonio González Millán, documentalista, xestor cultural e autor de proxectos de desenvolvemento e dinamización nos ámbitos galego e nacional, cunha ampla bagaxe en promoción cultural (de Barbanza, de Galicia) a través de publicacións, relatorios, colaboracións de prensa, etcétera.
A exposición conta co patrocinio da Xunta (a Consellería de Cultura a través de O Teu Xacobeo) e a colaboración do Concello de Rianxo.
No acto de este venres intervirán Adolfo Muíños Sánchez, alcalde de Rianxo, Manuel Mariño Nin, presidente da Asociación Camiño de Santiago do Barbanza e Antonio González Millán, comisario da exposición.
