Este marzo bota a andar a peregrinaxe do Camiño de Santiago do Barbanza

A Asociación Amigos do Camiño de Santiago do Barbanza. A Orixe, en colaboración coa Mancomunidade de Municipios Arousa Norte, presentou esta mañá en Corrubedo a peregrinaxe por etapas do Camiño de Santiago do Barbanza, contando coa presenza de representantes dos concellos polos que transcorre: Ribeira, A Pobra do Caramiñal, Boiro, Rianxo, Dodro e Padrón.

O encargado de abrir o acto foi Manuel Mariño Nin, presidente da referida asociación, quen destacou a “esencia” desta ruta e incidiu en que, ademais de natureza e gastronomía, ten unha motivación “no acompañamento físico no percorrido do Apóstolo, que é algo que ningún camiño ten.” Neste senso, engadiu que “despois do Camiño Francés, creo que somos en motivación, natureza e gastronomía os número un.” Tamén se referiu á exposición itinerante que, baixo o título As pegadas do Camiño de Santiago no Barbanza: A Orixe, reflicte por medio de fotografías as evidencias históricas da ruta xacobea entre Corrubedo e Santiago. A continuación, detallou que a peregrinaxe está dividida en 5 etapas e desenvolverase ao longo do mes de marzo e abril. A primeira terá lugar o 15 de marzo, polo que as persoas participantes deberán estar ás 08.30 horas na Igrexa do Xobre, na Pobra do Caramiñal, desde onde sairán os autobuses con dirección a Corrubedo. A saída está prevista para as 09.00 horas da Igrexa de Corrubedo coa entrega das credenciais necesarias para poder obter a Compostela. A organización tamén facilitará avituallamento. A segunda etapa será o 22 de marzo, contemplando o tramo desde A Pobra do Caramiñal a Neixón; a seguinte realizarase o 29 de marzo desde Neixón a Isorna; a cuarta etapa celebrarase o 18 de abril de Isorna a Padrón; e o último tramo efectuarase o 25 de abril desde Padrón a Santiago.

Pola súa parte, o vicepresidente da citada entidade, Manuel Antonio Villar, explicou que este traballo naceu dous anos atrás, comezando a materializarse a finais do 2019. Ao longo do período de traballo, documentación e catalogación, precisou que descubriron que este camiño é posible a través da historia e dos fitos xacobeos, atopándose máis de 200 referencias. A este respecto, afirmou que se trata dun “proxecto ambicioso.” Así mesmo, subliñou que “o noso non é un camiño de sendeirismo, é un camiño de peregrinaxe porque nos leva cara a tumba do Apóstolo.”  

Finalmente, o presidente de Arousa Norte e alcalde de Ribeira, Manuel Ruiz, pechou o acto. Durante a súa intervención, sinalou que “é un proxecto conxunto, no que todos somos indispensables” e salientou que “o camiño leva asociado, en primeiro lugar, espiritualidade, pero a ninguén se lle escapa que tamén un pode ter a posibilidade de coñecer paisaxes, lugares, gastronomía… E creo que este camiño aporta todo iso, ademais dunha beleza natural que dificilmente imos atopar noutros.” Ademais, anunciou que non descartan a construción nun futuro dun Museo da Peregrina preto do faro de Corrubedo.

As inscricións son de balde e permanecerán abertas ata o 12 de marzo, ás 12.00 horas, ou ata que se esgoten as prazas, as cales son limitadas e cubriranse por orde. As persoas interesadas poden formalizala a través da páxina web www.aorixe.es ou realizar consultas mediante o enderezo electrónico asociacion@aorixe.es. Os menores de 16 anos deberán ir acompañados dos seus proxenitores ou titores legais.

O xeito de percorrer a primeira etapa da peregrinación será indo os participantes agrupados. Contarase con persoal da organización no inicio, no medio e no final. O ritmo medio establecerase nos 4-5 quilómetros/hora, tendo unha previsión de chegada ao Xobre, en torno ás 16.00 horas. É preciso levar roupa axitada ás condicións meteorolóxicas, así como comida e bebida suficiente para toda a xornada.