O Observatorio Astronómico Ramón María Aller da Universidade de Santiago organiza o Congreso Público Astronomía nas Rutas Xacobeas, unha iniciativa itinerante pola xeografía galega (e fóra dela) que vén cun completo programa de conferencias, presentacións, e sesións de observación nocturna do ceo, tanto a simple vista como con telescopios. O congreso iniciouse este venres en Padrón para continuar logo en Lalín, Boqueixón, Rianxo, Teo, Allariz, O Barco de Valdeorras, Sanxenxo, Ribadeo, Monforte, Noia e Vedra, aínda que en varios concellos haberá máis dunha sesión. No caso de Rianxo, as actividades serán este 24 de xullo e, xa no mes de agosto, o día 25.
Máis en detalle, as citas rianxeiras serán o vindeiro venres 24 de xullo ás 21.45 horas e o martes 25 de agosto ás 21.00 horas. Levaranse a cabo Centro Sociocultural – Auditorio de Rianxo e contarán con relatorios sobre a tradición astronómica ligada á cultura do Camiño e, tamén, con sesións posteriores de observación. Só se poderá acudir con reserva de praza, que se pode facer a través da conta de correo auditorio@concelloderianxo.gal (preferente) ou no teléfono 664 18 32 17.