Unha das iniciativas estrela da Mancomunidade Arousa Norte, o autocine Lúa Chea no Barbanza, estréase esta fin de semana coa mellor das benvidas posíbeis: unha importante participación anticipada das seareiras e seareiros do cinema dos nosos concellos, que se traduce no cartel de “completo” para as catro primeiras sesións, programadas para Cabo de Cruz e Boiro. Nestas localidades xa están reservadas as 310 prazas de estacionamento que se poñían a disposición da veciñanza, cun aforo próximo ás 1.100 persoas. Este récord de participación logrouse en pouco máis de 48 horas.
Segundo informa a Mancomunidade, “a acollida do público vai da man coa singularidade da proposta”, que reside na seguridade que ofrece, “en consonancia cos protocolos para evitar a propagación da COVID-19”.
A idea de Arousa Norte foi facer rexurdir unha fórmula de éxito antano, os autocinemas, e adaptala aos novos tempos, nos que resulta máis necesario ca nunca o distanciamento social. “Trátase dun evento 100% COVID-free”, explica a organización.
A maior novidade é a aposta por unha pantalla con tecnoloxía LED para poder engadir unha sesión de tarde, dado que non está condicionada á ausencia de luz ambiente para unha visualización perfecta.
O ciclo de autocine Lúa Chea Non Barbanza arrinca este fin de semana en Cabo e Boiro, con películas de diversos xéneros, entre eles o familiar, o actual, o cinema galego ou o de humor. A esta cita seguirán as de Ribeira (10 e 11 de xullo), Rianxo (17 e 18 de xullo) e Pobra do Caramiñal (21 e 22 de agosto).
O porto boirense de Cabo de Cruz será o encargado de dar o pistoletazo de saída a partir das 20,30 horas do venres.
O programa, punto por punto
Como dixemos, a proposta Autocine Lúa Chea no Barbanza comezará no concello de Boiro o venres 3 de xullo na peirao de Cabo de Cruz con dous pases: ás 20h30 Grease (cinema clásico) e as 23h30 Parásitos (cinema actual) e o sábado 4 de xullo ás 20h30 Pinoccio 3000 (cinema familiar) e O que arde (cinema galego).
A seguinte fin de semana, será no concello de Ribeira (Porto – Muelle Comercial): venres 10 de xullo ás 20h30 Sonrisas de una noche de verano (cinema clásico), Somos Criminais (produción galega) e o sábado 11 de xullo ás 20h30 Gorgi, las mascotas de la reina (cinema familiar) e ás 23h30 Tolkien (cinema actual).
A fin de semana do 17 de xullo, Lúa Chea no Barbanza chegará a Rianxo ás 20h30 con Cinema Paradiso (cinema clásico) e ás 23h30 O que arde (cinema galego), e o sábado 18 de xullo ás 20.30 horas é a quenda de O Cid (cinema familiar) e ás 23.30 horas La Biblioteca de los libros rechazados (cinema actual).
O peche do autocine terá lugar no Concello da Pobra do Caramiñal na explanada portuaria do aparcadoiro o venres 20 de agosto ás 20h30 La vida es bella (cinema clásico), e as 23h30 Eroski Paraíso (cinema galego) o sábado 22 de agosto ás 20h30 Pérez, o ratonciño dos teus soños (cinema familiar) e Bohemian Rapsody (cinema actual).
