Este sábado celébrase a manga definitiva da I Regata Ría de Arousa

17 Xullo 2020

Logo da parada deportiva motivada pola alerta sanitaria, volven os nosos veleiros a cazar vento. Este sábado 18 de xullo, sen ir máis lonxe, celebrarase a manga final (a definitiva) da primeira edición da Regata Ría de Arousa, organizada polo Club Náutico Arousa Norte, que vai poñer en práctica os máis estritos e exhaustivos protocolos de seguridade (os dispostos pola Xunta e máis pola Real Federación de Vela). A saída está prevista para as 14.00 horas, dende o porto da Pobra do Caramiñal. As embarcacións tentarán disputarse os primeiros postos da clasificación xeral nas clases ORC A, ORC B e ORC C, así como o Trofeo A Casa da Tía Elisa ao gañador global desta última etapa.

Entre os cambios levados a cabo polo comité organizador inclúense avisos a regatistas de maneira dixital por medio do TOA virtual, uso de máscara e xeles desinfectantes por parte de todos os participantes, ademais dunha entrega de trofeos sen contacto entre participantes. Ademais, no acto farase entrega dos premios aos gañadores das dúas anteriores etapas: o Trofeo A Poutada e o Trofeo Pazo de Rubianes.

Como vén sendo habitual, o comité de regatas habilitará un dispositivo de unha saída que será posíbel seguir desde moitos puntos da vila. A organización agoira un tempo axeitado para a celebración do evento deportivo: a previsión meteorolóxica augura unha xornada con sol e ventos frouxos de dirección variábel, o que podería primar ás tripulacións máis técnicas.

Outros artigos

Publicidade

Revista en papel

Opinión

“Meus irmáns” – Xulio Xiz

“Meus irmáns” – Xulio Xiz

Fóronse meus dous irmáns: Mato, o maior, e Santi, o pequeno. O maior, morreume hai unhas semanas. O máis novo, o día do Pai. Se Xesús tivo vida longa e froitífera, Santi foise moi cedo despois de poñer unha pica en Bristol. Os tres somos tamén agora irmáns en terra:...