O deputado delegado da Área de Asistencia aos Concellos, José Manuel Lage Tuñas, reuniuse esta mañá co alcalde de Dodro, Xabier Castro Tourís, e cos membros do goberno municipal para analizar as necesidades do municipio tras a crise sanitaria da Covid-19.
Lage afirmou que a reunión de hoxe continúa a rolda de contactos coa que o Goberno provincial pretende escoitar as necesidades dos municipios para facer fronte aos efectos sociais e económicos da pandemia, unha vez superada a crise sanitaria.
O deputado lembrou que o pleno da Deputación vén de aprobar a primeira achega do Plan único 2020, de 41,2 millóns de euros, dos que Dodro recibe 146.000 euros. Destes fondos, 18.787 euros corresponden a unha achega extraordinaria para axudar aos municipios a afrontar o incremento do gasto social derivado da crise da Covid19.
“A Deputación está destinando importantes recursos para apoiar os concellos tras o coronavirus, tanto reforzando os servizos sociais como axudándoos na recuperación económica e a creación de emprego”, afirmou Lage Tuñas, que destacou tamén os importantes investimentos que a Deputación realiza no municipio a través do programa de servizos sociais comunitarios (87.841 euros) e do PEL, que este ano permitirá crear catro empregos no Concello de Dodro. Neste sentido, o alcalde destacou o traballo desenvolvido polo concelleiro de Servizos Sociais, Xoán Bautista Mariño, que promoveu, entre outras cousas, a contratación dunha asistenta social para afortalar a área.
Pola súa banda, o alcalde de Dodro agradeceu a visita do deputado provincial e destacou “a utilidade dos fondos da Deputación, especialmente para os concellos rurais coma o noso, no que estamos experimentando un notable incremento da demanda de axudas sociais tras a crise sanitaria”.
