Ao abeiro do programa de actividades dun dos grandes acontecementos deste verán en Rianxo, a nova edición do festival Noites de Jazz, inaugúrase este venres 24 de xullo, no Centro Sociocultural-Auditorio, unha mostra de debuxos que traducen a imaxes e palabras as expresións, as emocións e os descubrimentos sensoriais que comparten músicos e público arredor do devandito estilo de música (moitos estilos, en realidade, baixo unha mesma etiqueta: o jazz). Estamos a falar da exposición Jazz Espido. 17 debuxos de Eva Lloréns e 17 poemas de Mª do Carme Kruckemberg, que, como dixemos, ábrese ao público este venres ás 12.30 horas.
Unha mostra que primeiro foi libro
A mostra xorde do traballo conxunto, orixinariamente en formato libro (editado por Barbantesa), da poeta viguesa María do Carme Kruckenberg e maila artista Eva Lloréns. Jazz espido cingue textos sobre grandes instrumentalistas e voces do jazz acompañados de espidos masculinos e femininos que “ilustran os movementos e sentimentos dos versos”, segundo reza no resumo orixinario do proxecto, unha colección de “imaxes feitas palabras que expresan a grande admiración da autora pola música do jazz”.
A inauguración
A exposición ábrese ao público este venres 24 ás 12.00 horas. Será no marco dunha rolda de prensa na que tamén se darán a coñecer as actuacións do festival Noites de Jazz. Estarán presentes Xoán Pastor (director do Museo de Artes do Gravado á Estampa Dixital), Mercedes Queixas Zas (poeta, novelista e política), Raquel García Abuín (concelleira de Cultura do Concello de Rianxo) e Adolfo Muíños Sánchez (alcalde do Concello de Rianxo).
