A banda boirense de rockeiras Agoraphobia vén de revolucionar as redes cun novo vídeo-clip de seu, Inglorious Mind, un audiovisual que alén das súas importantes contribucións musicais, ten un elemento extra de relevancia ao ser unha iniciativa solidaria co gremio dos técnicos do directo dos espectáculos musicais. Protagonizado polo actor Luís Zahera, o vídeo está adicado a un dos sectores máis afectados economicamente pola crise da COVID-19.
Segundo informan as integrantes da banda de Boiro, o beneficio íntegro derivado da venda da canción en plataformas dixitais, das reproducións do vídeo-clip e da poxa de cinco instrumentos Epiphone irá destinado a PEATE (Plataforma Estatal de Asociacións de Técnic@s do Espectáculo).
O tema Inglorious Mind é unha das cancións incluídas no seu último disco Unaligned. Dirixido por Jacobo Areal e protagonizado polo actor Luís Zahera, ten como dixemos unha importante vertente solidaria: o beneficio íntegro derivado da venda da canción en plataformas dixitais e das reproducións do vídeo durante 6 meses, ademais do recadado na poxa de catro guitarras e un baixo doados por Epiphone (prestixiosa marca de instrumentos profesionais) e as tendas Rockbox, ArdeMadrid e Málaga 8, irá destinado a PEATE (Plataforma Estatal de Asociacións de Técnic@s do Espectáculo), para que os seus integrantes poidan “constituírse como asociación e ao fin ter voz por si mesmos”.
