A empresa galega Aerocamaras, especializada en desenvolvemento de drons e en formación vencellada a este tipo de vehículos aéreos non tripulados, continúa o seu periplo de capacitación e demostración polo noso litoral. Así, o vindeiro martes 21 de xullo os técnicos de Aerocamaras realizarán unha demostración de salvamento marítimo con drons coa Policía Local o grupo de Protección Civil do Concello de Ribeira.
Esta actividade é unha práctica que se celebra ao abeiro da Formación Profesional de Drons en situacións de emerxencia e seguridade de Aerocamaras, que se imparte o luns e o martes aos integrantes dos ditos corpos locais.
A sesión desenvolverase na praia de Coroso entre as 15 e as 18 horas: de 15 a 16 un instrutor realizará unha explicación da práctica e de 16 a 18 horas faranse varias demostracións prácticas coma se se tratase dun caso real.
A experiencia consistirá en simular unha situación de emerxencia na que unha persoa necesita ser rescatada no mar. O dron localiza ao suxeito e procede a carrexarlle un marpa (elemento que contén material útil para o suxeito como un chaleco salvavidas) que deixará caer nas súas proximidades para que poida manterse seguro e estábel até o seu rescate. O vehículo aéreo tamén dispón dun altofalante para conseguir comunicación directa e tranquilizar á persoa na auga.
