A Televisión de Galicia emite este mércores a partir das 10,00 horas os debates provinciais entre candidatos das sete principais forzas –PP, Marea Galeguista, PSdeG, BNG, Galicia En Común, Cidadáns e Vox– que compiten nas eleccións autonómicas deste 12 de xullo.
Os debates ofreceranse en desconexión provincial a partir das 10,00 horas, dentro do espazo informativo ‘ Bos Días’. Os encontros repiten o esquema do debate entre cabezas de lista celebrado na noite do pasado luns na Televisión de Galicia. Así, haberá catro bloques temáticos –coronavirus, economía, políticas sociais e gobernabilidade e encaixe de Galicia no Estado– nos que non haberá quendas fixos de intervención. Deste xeito, será o moderador quen reparta os tempos “da forma máis equitativa posible”, segundo detalla o ente público.
Os debates terán unha hora de duración e serán gravados en San Marcos, en Santiago. As emisións serán repetidas pola G2, a segunda canle da TVG, tras o Telexornal Serán entre o mércores e xoves. Deste xeito, poderán verse os debates de candidatos de Lugo e Ourense o mércores a partir das 23,00 horas. Á mesma hora, pero un día despois, ofreceranse os encontros provinciais de Pontevedra e A Coruña serán repetidos.
No debate da Coruña, os participantes serán Ánxeles Vázquez (PPdeG), María Chao Martínez (Marea Galeguista), Pablo Arangüena (PSdeG), Xosé Luís Rivas ‘ Mini’ (BNG), Luca Chao (Galicia en Común- Anova Mareas), Carmen Mahía ( Cs) e Ricardo Morado ( VOX).
