A Deputación acolle a presentación do mapa de xestión catastral aos concellos da provincia

16 Xullo 2020

Alcaldesas e alcaldes, entre eles os do Barbanza, interesáronse pola nova ferramenta, produto dun convenio entre a Deputación e o Catastro, que permite aos concellos coñecer e xeolocalizar a información de todos os bens inmobles do municipio, así como colaborar na actualización de datos

O deputado de Economía e Facenda, Antonio Leira Piñeiro, o xerente do Catastro en Galicia, Benito Bericohea, a xerente adxunta do organismo, Victoria Fernández e a vicetesoureira provincial, Ana Fernández, presentaron hoxe na sede da institución provincial a última dunha serie de xornadas destinadas  aos alcaldes e alcaldesas da provincia sobre novas formas de colaboración entre Castastro e concellos. A actividade dividiuse en varias edicións durante os últimos dous días debido á necesidade de acotar o aforo para garantir as medidas de prevención e seguridade con motivo da covid-19.

Os rexedores mostraron especial interese no mapa de xestión catastral, unha nova ferramenta, produto dun convenio entre a Deputación e o Catastro, que permite aos concellos coñecer toda a información detallada dos bens inmobles de cada municipio, así como colaborar achegando novos datos e documentación que permitan unha actualización constante do mapa.

Antonio Leira destacou que o obxectivo desta ferramenta é que os concellos podan contar cun inventario catastral o máis completo, actualizado e preciso posible e, ao mesmo tempo, colaborar co Catastro completando os datos trámites que faltan.

Leira sostivo que Deputación e Catastro seguirán colaborando estreitamente en cuestións que supoñan menos cargas, obrigas e desprazamentos para a cidadanía, máis axilidade nos trámites e mellor coordinación entre administracións.

Tanto o xerente do Catastro, Benito Bericochea, coma a xerente adxunta, Victoria Fernández, destacaron a aposta do organismo pola dixitalización  así como a “dobre utilidade” deste mapa, “un canal de información permanente entre o Catastro e os concellos”, cuxa colaboración resulta imprescindible para manter ao día datos coma as novas altas, rehabilitacións ou cambios de titularidade dos bens inmobles, xeolocalizando a información de forma moi intuitiva para o usuario.

Puntos de Información Catastral

Os responsables do Catastro subliñaron tamén a importancia de contar con Puntos de Información Catastral (PIC) nos municipios. “O PIC é abrir unha ventá do Catastro no concello”, afirmou Benito Bericochea, que animou aos municipios que aínda non contan con este servizo a implantalo, xa que evita desprazamentos e mellora a atención que se presta á cidadanía sen apenas custe para as entidades locais.

A Deputación da Coruña xa conta cun PIC en cada unha das zonas tributarias da provincia, onde a cidadanía pode acceder á información catastral, realizar trámites ou obter información.

Presentación do mapa de xestión catastral aos concellos da provincia

Outros artigos

“Día das Letras Galegas 2025”. Manuel Dominguez

Andrés do Barro, cantante, compositor de soul galego, grandes éxitos dende 1975 onde as linguas do Estado foron confinadas, censuradas, ata acadar o primeiro posto nas listas dos discos máis vendidos en España tres veces seguidas: primeiro en 1969 con O trem , logo en...

+

“O Barbanza: Cinco anos de xornalismo independente”

Hai cinco anos, en maio do 2019 nacía na súa edición dixital obarbanza.gal e uns días despois na de papel O Barbanza, sempre en galego e baixo a cobertura do Grupo Código Cero Comunicación. Dicíamos daquela que eramos un grupo de profesionais decididos a aventurarnos...

+

Publicidade

Revista en papel

Opinión

“No cárcere” – Xulio Xiz

“No cárcere” – Xulio Xiz

Como membro dunha sociedade democrática, con poderes básicos, forzas executoras, leis que marcan reglas de xogo, presunta igualdade de oportunidades e plena integración en Europa, calquera de nós corre perigo de pechar os ollos e coidar que vive nun mundo camiño da...