Nos Hospitais da Área Sanitaria de Santiago e Barbanza xa non hai ningún paciente ingresado con coronavirus, un feito que non acontecía dende o 12 de marzo que foi cando se rexistrou a primeira hospitalización por Sars Cov 2 no Clínico. Esta mesma mañá foi alta a domicilio, tras dar negativo a proba da PCR, o último paciente con coronavirus do HCU. Un home de 69 anos, con múltiples patoloxías previas que tivo unha longa hospitalización.
En total pasaron polos centros da área 479 pacientes (450 nos hospitais de Santiago e 29 no da Barbanza), dos que 48 precisaron ingresar nas unidades de críticos. O día que máis pacientes houbo nestas unidades foi o 6 de abril, que rexistrou 25 hospitalizados (1 deles na Rosaleda).
Por outra banda, os días que máis doentes houbo hospitalizados en total por coronavirus foron o 6 e o 13 de abril datas na que houbo 202 casos. O día 6 houbo 177 en hospitalización convencional (incluídas a residencia Porta do Camiño, Barbanza e a Rosaleda) e 25 nas unidades de Críticos (1 na Rosaleda).
O día 13 tamén se rexistraron 202 ingresados: 181 en hospitalización convencional (incluídas a residencia Porta do Camiño, Barbanza e a Rosaleda) e 21 nas unidades de críticos (3 na Rosaleda)
Parte de hoxe
O total de casos positivos na área é de 1.870. Ata o día de hoxe realizáronse 26.055 PCRs na área compostelá. Arestora hai 26 casos activos en domicilio e 1.735 curados.
