Os socialistas de Ribeira, a través do seu portavoz José Vilas, vén de presentar unha proposta sobre o estado do firme dos rueiros do lugar de Vilar, na parroquia de Carreira, e o deterioro no que se atopa. A proposta, que será tratada no pleno, pon o foco na importancia histórica e comunicativa do dito rueiro, que foi, e é, unha relevante vía de acceso e saída, amais de ser unha zona habitual de paso para as leiras da veciñanza e de acceso ao lavadoiro e aos muíños de auga do rego do Vilar.
Os socialistas lembran que o dito camiño público (viario 9012), está situado no lugar do Vilar (Carreira, Ribeira), entre a vía DP-7302 eo Camiño de Paramilla, tendo unha lonxitude duns 60 metros. O grupo do PSOE local explica que “o estado e condición do rueiro queda establecido no gran índice de deterioro do pavimento actual, no cal atopamos desgaste das distintas e irregulares capas de formigón, con descalces varios e fendas que afectan ao uso normal e á mobilidade dunha infraestrutura viaria”. O camiño, engaden, tamén presenta “distintos niveis de trazado, un deterioro palpábel no mesmo e unha falta de mantemento en materia de obra pública”.
En virtude de todo o exposto, o Grupo Municipal Socialista PSdeG-PSOE, instará ao pleno do Goberno a que os servizos técnicos do Concello estuden a adecuación dos espazos verdes do lugar, amais de elaborar un proxecto de pavimentado da calzada e a zona de rodadura, “coa finalidade de recuperar a funcionalidade do conxunto histórico do lugar do Vilar”. Os socialistas convidan tamén a realzar a escaleira de pedra e a habilitar lousas na base.
