Malia todas as cousas negativas, que foron moitas, o Estado de Alarma e o confinamento serviron unha vez máis para poñer os libros onde se merecen, no lugar onde poríamos os salvavidas fronte a adversidade. Isto tamén é aplicábel ás nosas bibliotecas municipais que, malia ter as portas pechadas, proseguiron a súa actividade achegándonos lecturas virtuais, relatos orais a través das redes e, por suposto, folgos literarios. O traballo online despregado polas bibliotecas durante a emerxencia sanitaria creou fortes ligazóns coa cidadanía pero tamén entre elas. Aproveitando estes lazos, este 23 de xuño comeza unha nova colaboración entre as #bibliotecasmunicipais de Galicia, co fin de ofrecer ás persoas usuarios da rede novas propostas conxuntas.
Segundo nos contan dende a Biblioteca de Rianxo, un dos grandes referentes da actividade bibliotecaria en tempos de COVID, todos os días (de luns a venres) ás 12:00 h. haberá unha publicación co cancelo #biblioveranengalicia co que cada biblioteca participante dará a coñecer as características máis representativas do seu concello a través dos libros. “Con esta iniciativa queremos promover o turismo pola nosa terra durante este verán, animando a coñecer todos os recunchos que aínda nos quedan por descubrir”, explican no manifesto conxunto da iniciativa, que é, un xeito moi acaído de resumir e explicar a esencia dun territorio concreto, a historia, a xente, a paisaxe e a natureza do concello onde vivimos, a través dos libros.
